domingo, 17 de setembro de 2017

NON AO CAMPO DE GOLF DE BAREDO. XEIRA EXPLICATIVA DE SOS GROBA




Onte sábado día 16 de setembro fixemos unha xeira informativa pola contorna da área que ocuparía o proxectado campo de golf denominado As Costeiras, na parroquia de Baredo.
Os veciños de Baredo veñen amosando a súa disconformidade co proxecto, e onte ficou outra volta patente. Xoves e anciáns que case non poden camiñar , achegaronse ata a Chan da Lagoa en coche para amosar o seu descontento e o seu enfado, portando carteis e faixas contra do campo de golf.
Os que non poideron facer todo o percorrido pola súa idade, estiveron sentados na contorna, falando entre eles e cos centos de persoas que se xuntaron para facer a marcha que partindo da entrada do Curro de Mougás, na estrada, foi baixando ata a Pedra Blanca, onde se fixo unha primeira parada para ver a contorna e a paisaxe fermosa que , nese intre, nos permitía ver as illas,  e Fisterra no hourizonte como unha balea flotando entre as nubes e o mar.
Xa no Campo de Isabel poidemos ver a contorna onde apareceron os restos arqueolóxicos, e dende alí ir bordeando os montes veciños de Mougás polas estremas ata o punto máis vistoso nos penedos de Enrique e os outeiros do Curro, dende onde se ve como a aba do monte chega ata as chans nas que empezan os campos e as casas dos veciños dos barrios de Baredo.
Vimos as nacentes das augas que abastecen ás fontes das que beben as traídas que levan ata as casas a auga, e as regueiras que no inverno baixan cheas facendo de veas da parroquia que regan campos e montes criando diversidade de flora e fauna no seu redor.
Cando un proxecto é tan malo como este e ten tantos erros na súa elaboración, non se pode argumentar nada a favor, a non ser que se esté cego ou se teña mala intención. Cando os veciños manifestan o rexeitamento que onte poidemos ver, e que nestes días na aldea veñen facendo patente por tódolos recunchos, só queda pedir a súa retirada do plan xeral de Baiona e a súa eliminación. Haberá outras obras e proxectos que sexan máis produtivos e menos lesivos para o medio ambiente e os veciños que merezan o esforzo e o investimento do concello, e que sin dúbida apoiaremos se cumpren coas regras básicas da sostentabilidade e respecto pola natureza e o patrimonio.
Grazas veciños de Baredo por defender o voso monte, que ao remate é de todos, a natureza e o voso patrimonio. Sempre nos teredes aí.

https://www.lavozdegalicia.es/noticia/vigo/baiona/2017/09/17/300-personas-protestan-campo-golf-baredo/0003_201709V17C8995.htm

https://youtu.be/Iz2c6xy_DbA
http://www.farodevigo.es/comarcas/2017/09/12/baredo-quiere-campo-golf/1748256.html

https://www.lavozdegalicia.es/noticia/vigo/baiona/2017/09/10/baredo-rebela-rechaza-acoger-mayor-campo-golf-provincia/0003_201709V10C7991.htm
https://telemarinas.com/continua-la-preocupacion-baredo-campo-golf/

https://valminortv.com/2017/09/16/mas-de-300-personas-muestran-su-rechazo-al-campo-de-golf-de-baredo/


Ningún comentario:

Publicar un comentario