O FORO GALEGO DO LOBO

RECORTE DE PRENSA

http://www.galicia-hoxe.com/indexCanales.php?idMenu=464&idNoticia=321423

Recentemente creouse o Foro Galego do Lobo co obxectivo de conservar a especie que está en perigo de extinción, e mellorar as axudas aos afectados polos danos que pode causar.

Dende SOS a Serra da Groba estamos a traballar para que se cree unha figura especial de protección para o Cabalo Ceibe Galego, xa que este tamén está en perigo de extinción e, o noso cabalo do monte, é un animal que vive ceibe no monte coma calquera outro animal salvaxe e posue, ao igual que o lobo, unha grande tradición e peso na cultura do noso país. Ao redor do noso Cabalo Ceibe hai moitas historias e particularidades que o fan merecente dun trato especial que non se lle está dando. Non só as festas dos curros ou as rapas, se non o grande labor ecolóxico que representa a súa presenza nos montes. Os nosos cabalos manteñen o mato nunhas condicións axeitadas para que o ciclo vital do monte se anove cada ano, para que moitas especies case invisibles para os ollos inexpertos se manteñan e produzan o miragre da excelsa beleza das nosa montañas. Ise, o lobo, é un parente que necesita da presenza dos nosos cabalos nos cumes e nas penichairas, compartindo territorio e tradición.

Nas milenarias pedras da Serra da Groba están marcadas as pegadas dos doús animais, coma testemuñas dun valor capital para os homes que os marcaron aí. A simbiose home/ besta vense dando dende os primeiros tempos , cando o home colonizou o territorio para humanizalo. Deixou pegada delo nun labor inxente manifesto no traballo de modelar a natureza e a paisaxe, xa con mámoas, petroglifos, foxos, cercados e tomadas, carreiros, minas e covas.

Hoxe, dende aqui, postos os ollos na Serra verde que aínda non amarelea pola calor serodia, xa non ollamolo lobo nin o ouvimos oulear. Mais, as greas estan xuntas, os machos andan a cubrir ás femias, as éguas que non empreñan co vento, e o deus Eolo, que lle alandea as crinas cando outean o hourizonte por riba dos penedos de A Gabiñeira, O Campuchan ou O Corrubelo, está a pedir mil anos máis de vida para o Cabalo Ceibe da Groba.

Pedimos ás autoridades sensibilidade, e a mesma atención para o noso Cabalo Ceibe Galego que para o mítico lobo.

Nesa loita estamos e non ímos parar ata conseguilo.